Եթե յուրահատուկ քաղցրավենիքի սիրահար եք, ապա այս բաղադրատոմսը հենց ձեզ համար է։ Այն չափազանց հեշտ է պատրաստելը և անսահման համեղ է։ Պատրաստեք և վայելեք մեկ բաժակ սուրճը այս թխվածքաբլիթներով։ Այն պատրաստելու համար ձեզ շատ քիչ բաղադրիչներ անհրաժեշտ կլինի։
Եվ այսպես՝
Ձվի սպիտակուց — 2 հ․
Շաքարավազ — 110 գ
Շոկոլադ — 60 գ
Ընկույզ — 100 գ
Վանիլ — 8 գ
Սկզբում կարելի է մանրացնել ընկույզն ու շոկոլադը։ Այն կարող եք անել դանակի օգնությամբ։ Սենյակային ջերմաստիճանի հասցրած սպիտակուցները հարել հարիչով։ Երբ այն կվերածվի փրփուրի, դանդաղորոն՝ առանց դադարեցնելու հարելու գործընթացը, ավելացնել շաքարավազը և վանիլը (շաքարավազն ու վանիլը նախապես կարելի է խառնել իրար)։
Շարունակել հարման պրոցեսը այնքան ժամանակ, մինչ շաքարավազն ամբողջությամբ կհալվի և կստանաք պինդ բեզե։ Այնուհետև ավելացնել մանրացված ընկույզն ու շոկոլադը և զգուշորեն խառնել, ապա վերցնելով փոքր չափաբաժիններ՝ ձևավորել մոտավորապես 4 սմ տրամագծով թխվածքաբլիթներ։
Թխել 180 աստիճան տաքացված ջեռոցում ուղիղ 5 րոպե(ջեռոցը նախապես պետք է տաքացված լինի), որից հետո անջատել ջեռոցը և թխվածքաբլիթները թողնել այնտեղ 2 ժամ։ Շատ կարևոր է այդ ընթացքում չբացել ջեռոցը։
