«Համեղ գնդիկներ»։ Առաջարկում ենք մի բաղադրատոմս, որն անմիջապես պատրաստելու մի շարք պատճառներ ունի։ Այն անչափ համով է, անհավանական փափուկ է , պատրաստման համար քիչ ժամանակ է պահանջում և այնքան գեղեցիկ է, որ կարելի է զարդարել յուրաքանչյուր տոնական սեղան։ Եվ այսպես, համով գնդիկներ պատրաստելու համար ձեզ անհրաժեշտ է՝
Խմորի համար՝
Ձու — 3 հ․
Շաքարավազ — 100 գ
Ալյուր — 120 գ
Փխրեցուցիչ — 1 թ\գ
Բուսայուղ — 3 ճ\գ
Աղ՝ մեկ պտղունց
Կրեմի համար՝
Շաքարի փոշի — 70 գ
Սերուցքային պանիր — 70 գ
Սերուցք(35%) — 200 մլ
Ձուն, որը չպետք է լինի սառնարանից ,հարել մեկ պտղունց աղի հետ, ավելացնել շաքարավազը և հարել մինչ սպիտակ, փքված զանգված ստանալը։ Այնուհետև լցնել ալյուրը և փխրեցուցիչը։ Խառնել այնքան, մինչ կստացվի համասեռ զանգված։ Խառնել փայտե գդալի օգնությամբ։
Ավելացնել բուսայուղը և շարունակել զգուշորեն խառնել։ Տեղափոխել մոմաթղթով ձևամանի մեջ և թխել 180 աստիճան տաքացված ջեռոցում՝ 15-20 րոպե։ Սառելուց հետո այն վերածել փշրանքների։ Կրեմը պատրաստելու համար բոլոր բաղադրիչները միախառնել իրար և հարել։
Կրեմը միացնել փշրանքների վերածած խմորին, ապա թաց ձեռքերի օգնությամբ ձևավորել գնդիկներ։ Գնդիկները թաթախել կակաոյի մեջ։
