Ժամանակներն այնպիսին են, որ ավելի հաճախ օգտվում ենք խանութների քաղցրեղենից՝ քաջ գիտակցելով, որ որքան էլ պատրաստի քաղցրեղենը համով լինի, միևնույնն է տանը պատրաստած ամենահասարակ թխվածքաբլիթն անգամ ամենահամեղն է։ Ժամանակի սղության պատճառով ոչ միշտ է հաջողվում երկար ժամանակ անցկացնել խոհանոցում։ Օգտվեք թխվածքաբլիթի անչափ դյուրին այս բաղադրատոմսից, որի պատրաստման համար անհարժեշտ կլինի ընդամենը մի քանի րոպե, իսկ արդյունքում կստանաք բերանում հալվող թխվածքաբլիթներ։ Պատրաստեք և կհամոզվեք։
Անհրաժեշտ է՝
Սերուցքային կարագ — 130 գ
Շաքարավազ — 80 գ
1 դեղնուց
Մայոնեզ — 3 ճ․գ․
Ալյուր — 300-320 գ
Փխրեցուցիչ — 2/3 թ․գ․
1 պտղ․ աղ
1 պտղ․ վանիլին
Կարագին ավելացնել շաքարավազը, աղը, վանիլինը։ Խառնել մինչ համասեռ զանգվածի վերածվելը, լցնել դեղնուցը, մայոնեզը։ Խառնել այնքան, մինչ շաքարավազն ամբողջությամբ կլուծվի։ Լցնել ալյուրի կեսը և փխրեցուցիչը։
Ալյուրի մյուս մասն լցնել քիչ-քիչ և ստանալ շատ փափուկ խմոր։ Ծածկել և քսան րոպեով դնել սառնարանում, որից հետո բաժանել 2 մասի և յուրաքանչյուրի ստանալ երկար ձողեր և բաժանել ոչ մեծ կտորների։ Տեղափոխել յուղաթղթով նախապատրաստած ձևամանի մեջ։ Թխել 180 աստիճան տաքացված ջեռոցում՝ 25 ր․։
Կստացվեն ոսկեգույն, վարդագույն թխվածքաբլիթներ, որոնք հիշեցնում են մանկության համը։ Կարելի է մատուցել շաքարի փոշիով։